Հետաքննիչի ապօրինի որոշումը վերացվեց. ապահովագրականից խաբեությամբ գումար կորզելու գործը նորմալ քննության կենթարկվի
23 Մարտ, 2018Հետաքննիչի ապօրինի որոշումը վերացվեց. ապահովագրականից խաբեությամբ գումար կորզելու գործը նորմալ քննության կենթարկվի
Ճանապարհատրանսպորտային պատահարի ժամանակ ավտոմեքենայի կողաշրջման հետևանքով մեքենայի ուղևորը ստացել էր մարմնական վնասվածքներ և տեղափոխվել հիվանդանոց: Մեքենայի վարորդի պատասխանատվությունն ապահովագրած հայաստանյան խոշորագույն ապահովագրական ընկերությանը հիվանդանոցը ներկայացրել էր հաշիվ՝ տուժողին մատուցված բժշկական ծառայության դիմաց վճարի փոխհատուցում ստանալու նպատակով:
Ապահովագրական ընկերությունը, ունենալով բավարար կասկածներ, որ ներկայացված հաշիվը ուռճացված է և ամենայն հավանականությամբ փորձ է արվում ընկերությունից խաբեությամբ ստանալ ավել գումար, դիմել էր ոստիկանություն: Սակայն ոստիկանությունը գործի հարուցումը մերժել էր՝ անբավարար հիմքերի պատճառաբանությամբ: Հետաքննիչի որոշումը բողոքարկվել էր ՀՀ դատախազություն, իսկ այնուհետև՝առաջին ատյանի դատարան, սակայն երկու դեպքում էլ մնացել էր անփոփոխ:
Իր իրավունքների պատշաճ պաշտպանության նպատակով ապահովագրական ընկերությունը դիմել է AM իրավաբանական ընկերություն, որի փորձառու փաստաբան Դավիթ Հունանյանը դատարանի որոշումը բողոքարկել է ՀՀ վերաքննիչ դատարան: Վերջինս, ստուգելով դատարանի որոշման օրինականությունն ու հիմնավորվածությունը, գտել է, որ հետաքննիչը ուներ հանցագործության հատկանիշներ մատնանշող բավարար տվյալներ և չուներ դրանք հերքող որևէ նյութ, հետևաբար պարտավոր էր քրեական գործ հարուցել, ինչը չէր կատարել:
Այսպիսով, AM-ի մասնագետների կողմից ներկայացված հիմնավոր փաստարկների շնորհիվ Վերաքննիչ քրեական դատարանը վերացրել է հետաքննիչի ապօրինի որոշումը, որի արդյունքում դատախազը պարտավոր է հարուցել քրեական գործ:
